“Merr një buzëqeshje, dhuroje aty ku nuk ka.”

Të sjellim sadopak gëzim e buzëqeshje atje ku ka nevojë.

Kjo është motoja e Klubit Shpresa dhe dëshira më e madhe e përfaqësuesve të tij.

Të kontribuosh në bamirësi dhe të ndihmosh të tjerët, është tashmë një traditë e bukur dhe shumë e dashur në shkollën tonë, është një prej vlerave që na përfaqëson. Në shërbim të kësaj nisme, Klubi Shpresa është ndër Klubet e para që fillon aktivitetin e tij.

U zhvillua seminari i parë i Klubit Shpresa, ku morën pjesë përfaqësuesit përkatës të klubit për secilin paralel dhe secilën klasë. Si fillim përfaqësuesit e këtij viti u njohën me arritjet e deritanishme të klubit, të cilat u paraqitën në një video- montazh.

Më pas, nxënësit u njohën me objektivat e synuara për këtë vit, ndër të cilat përmenden ndihmat e planifikuara në 3 shkolla dhe 2 kopshte publike, në Shoqatën e Jetimëve, në Shoqatën e Fëmijëve me Aftësi të Kufizuara, aktivitet në bashkëpunim me organizatën jofitimprurëse DSA, mbledhje ndihmash në ushqime në bashkëpunim me Foodbank Albania dhe aktivitete të planifikuara për “Fundjavë ndryshe”.

Panairi Ushqimor është nga aktivitetet kryesore të këtij klubi. Panairet do të zhvillohen përgjatë muajit tetor dhe në to do të marrin pjesë të gjithë nxënësit e shkollës sonë sipas paraleleve. Urojmë që edhe këtë vit të kemi sa më shumë aktivitete bamirësie të realizuara dhe të bëjmë të lumtur sa më shumë fëmijë!

Përgatiti: Imelda Prençe